Dapat nga magdangup sa National Bureau of Investigation (NBI) kag sa Department of Justice (DOJ) ang babaye nga ginkilala kay Evelyn Ruelan nga residente sang Cadiz City nga gina-alegar biktima sang identity theft.
Sa interview sang DYHB kay Philippine Statistics Authority (PSA) Negros Occidental Registration Officer II Edwin P. Guiking iya ginpahayag nga indi na ila opisina ang makasolbar sang isyu.
Suno kay Guiking nga sarang si Reulan makapalapit sa NBI agud makapatigayon sang tracing angut sa kun sin-o man ang naghatag kag nag-gamit sang iya sini personal nga impormasyon.
Madumduman nga sang damlag lang ginpahayag ni Ruelan nga natalana kuntani nga siya ang magpakasal sa nauna nga semana sang bulan sang Disyembre sini nga tuig 2024 sa iya duha na ka tuig nga live-in partner nga si Reylan Escalan.
Apang sa tunga sang pagpreparar sa nagahilapit nga kasal kag sa pagproseso sang mga nagakaigo nga dokyumento kaangay sang Certificate of No Marriage (CENOMAR) sa Philippine Statistics Authority (PSA), nakita nga si Ruelan ang kasado sa isa ka Indian national.
Nadiskubrihan nga ang identity ni Ruelan ang gingamit sang wala pa matumod nga persona agod magpasakal kay Jacdev Singh sadtong Nobyembre 16,2023 sa Valenzuela City, Metro Manila.
Natalana naman nga magapakig-kita sang personal si Ruelan kay Guiking para mag-istoryahanay natuhoy sa mga dokumento kag proseso nga dapat himuon sini.
