Ginmando na ni Bacolod Mayor Albee Benitez ang imbestigasyon sa gina-alegar extortion sa Office of the Building Official (OBO). Ini ang kasunod nga may tagreklamo nga nagpahayag nga may OBO personnel nga nagpangayo sa iya sang P100,000 agud mapadasig ang pagproseso sang iya papeles tubtob nga nagsaka pa sa P400,000.
Kasunod sini, ginpahayag sang alkalde nga mas maayo kon magpasaka sang formal complaint ang tagreklamo agud mausisa ini sang husto. Apisar sini ginmandu ni Benitez kay city legal officer Atty. Romeo Carlos Ting Jr. nga imbestigahan gihapon ang nasambit nga reklamo.
Nahibalu-an nga magluwas sa mga empleyado sang OBO, may yara man sang gin-alegar fixers nga naga-transaksyon mismo sa amo nga opisina.
Samtang ginbuyagyag man ni Benitez nga dismayado ini bangud tubtub subong wala pa nasuguran ang digitalization sa OBO.
Luyag kuntani sang alkalde nga mangin online na ang application sang mga dokumento kag makakas ang face-to-face transaction.
Madumduman nga sang Lunes, Noviembre 18 ginkakas sa pwesto si Engr. Isidro Sun bilang tagpamuno sang OBO kag gintal-usan ni Engr. Amy Tentia nga amo karon ang officer-in-charge (OIC).
