BACOLOD CITY- Pilason ang pito ka mga elementary pupil sang Sum-ag Elementary School kag duha ka mga ginikanan matapos nga mabungguan sang tricycle sa National Road sakop sang Barangay Sum-ag sa ciudad sang Bacolod, las-4 sang hapon, Martes nga adlaw, Nobyembre 19.
Ang pito ka mga elementary pupil ang ginalakipan sang isa ka babaye kag anom ka mga lalaki nga lunsay mga menor de edad.
Ang duha mga ginikanan amo sanday Hily Cuenca, 50-anyos, kag Phoebe Islao , 41-anyos, kag lunsay residente sang Barangay Pta. Taytay sa amo nga ciudad.
Samtang ang driver sang tricycle ginkilala nga si Nelson Jalandoni, 76-anyos, kag residente sa amo nga Barangay.
Ginpahayag ni Bacolod City Police Office Traffic Management Unit Police Major Ramel Sarona, nagatabok nagikan sa eskwelahan padulong simbahan ang mga pedestrian sang hinali lang nga nabungguan sila sang tricycle padulong Sur nga direksyon.
Gina-alegar madasig ang pagpadalagan ni Jalandoni sang iya nga tricycle. Gilayon naman nga gindala sa ospital ang nga biktima sa amo nga ciudad, kag gindala man sa Bago City Hospital si Jalandoni bangod sa minor injuries kag naglain ang pamatyag.
