Natalana nga pagahatagan sang relocation ang mga biktima sang nagluntad nga sunog sa Punta Cabahug, Barangay Zone 6, ciudad sang Cadiz kahapon, Nobyembre 20, 2024.
Sa interview sang DYHB kay Cadiz City Mayor Bading Escalante iya ginpahayag nga 13 ka mga balay ang naupos sa sunog. Ini ang ginapuy-an sang 18 ka mga pamilya. Yara karon ang mga nasunugan sa evacuation site sang Barangay kag naghatag naman sang dugang nga tent ang ciudad sa mga biktima subong man ang mga kinahanglanon sang mga ini.
Pahayag sang akalde nga nagtanyag naman ini sang relocation site sa mga biktima nga may gamay nga kalayuon sa barangay apang malapit naman sa City Proper.
Matapos ang nagluntad nga sunog nagplano naman si Punong Barangay Kap Ogol Villacin sang Tinampaan nga igahatag ang mga plywood nga ginakabig waste materials sang solar company nga nahamtang sa ciudad agud magamit sang mga nabiktima sang sunog. Madumduman nga base sa imbestigasyon, nag umpisa ang sunog sa isa ka gina-obra nga balay kun sa diin nagagamit ini sang Electric welding Machine. Nagdangat naman sa ginabulubanta P600,000 ang nangin damage sang nagluntad nga sunog.
