Ginaduso sang Bacolod City government pinaagi sa Bacolod Environment and Natural Resources Office (BENRO) ang pagpatuman sang programa nga “No Plastic Wednesday” sa ciudad.
Sa interview sang DYHB kay BENRO Head Ma. Fe Tresfuentes iya ginpahayag nga ang programa ang ginalauman nga makapanubo sang paggamit kag polusyon sang plastic sa Bacolod.
Suno kay Tresfuentes nga ang Pilipinas sa karon ang ginakabig bilang Top 3 nga may pinakadaku nga posyento sang naga-produce sang plastic sa kalibutan.
Ang ginaduso nga ‘no plastic wednesday’ ang angut sa City Ordinance No. 562, enacted sadtong 2011 kag gin-amyendahan tinalikdan nga 2018 nga naga-regulate sang paggamit sang single plastic bag. Nagahulat sa karon ang BENRO sang executive order para sa opisyal nga paglunsar sang programa.
Nagahinyo naman sang suporta si Tresfuentes sa mga establishment kag sa publiko nga mag-upod kag mag-isa sa pagpatuman sang programa agud mahaganhagan ang polusyon sang plastic sa ciudad sang Bacolod.
