Gin-ako sang 14-anyos nga lalaki nga manghud sang tiya sang 8-anyos nga biktima nga nasapwan nga nagaka-agnas sa Sitio Omot, Barangay Santol sa banwa sang Binalbagan, sadtong Sabado, Nobyembre 23, ang pagpanglabo.
Ginpahayag ni Police Major Jun Ray Batadlan, hepe sang Binalbagan Municipal Police Station, nga
sa pagpatigayon sang maid-id nga imbestigasyon sang kapulisan, nadiskubrihan ang bayo nga may dugo sang suspetsado sa balay sang mga ini.
Gintuad sang suspetsado nga iya ginlabo ang biktima gamit ang binangon apang wala niya ginsiling kun ano ang rason sa krimen.
Dugang ni Batadlan, bangod nga menor de edad ang suspetsado yara na ini sa karun sa Municipal Social Welfare and Development para sa nagakaigo nga disposisyon.
Una na nga ginsiling ni Rolly Villaespin, amay sang biktima, ulihi nakita ang biktima sa ila nga balay las-6 sang aga sang Nobyembre 19, agod magpadulong sa eskwelahan.
Ginalauman sang amay nga nagtinir lamang ang iya nga bata sa mga katiyaan sini bangod kapin isa ka oras ang lalakton padulong sa eskwelahan nagikan sa ila nga balay.
Nagligad ang Nobyembre 22, didto na ginpangita ni Villaespin ang iya bata kag iya nadiskubrihan nga wala ini sa balay sang iya nga tiya, rason nga iya ini ginparekord sa Barangay kag Binalbagan MPS. Sabado sang hapon, nasapwan ang biktima sa tunga sang kampo, pila ka metro ang kalayuon sa balay sang iya tiya. Nakita ang biktima nga nagahamyangon, wala na sang isa niya ka abaga, isa ka kamot, kag wala na sang duha ka tiil.
