Nakabaton sang P 2.3 Million nga balor sang farming equipment ang pila ka mga asosasyon sang mga mangunguma sa Negros Occidental, kahapon nga adlaw, Nobyembre 27, 2024.
Ginpangunahan nanday Governor Bong Lacson kag Provincial Agriculturist Dr. Dina Genzola ang ceremonial turnover nga ginhiwat sa Negros First Organic Technology Center sa Barangay Tabunan, cuidad sang Bago.
Nagbaton sang mga threshers kag pila pa ka mga farming machinery ang mga mangunguma nga gikan sa mga banwa sang Don Salvador Benedicto, Calatrava, Murcia, La Castellana, Candoni, Hinoba-an, Moises Padilla, kag mga cuidad sang Bago, kag Victorias.
Gintudluan man sang mga katapo sang Office of the Provincial Agriculturist ang mga mangunguma kon paano tatapun kag e-maintain ang bag-o nga mga farming equipment nga ila nabaton.
Ang nasambit nga mga threshers ang custom-built kag gindisenyo agud nga mas mangin efficient kag mas daku ang capacity sini sang sa manual nga threshers.Ginalauman man nga mapanubo ang post-harvest loss pinaagi sa bag-o nga mga farming equipment nga ginpanghatag sang probinsya.
