PROVINCIAL CAPITOL – Wala sa gihapon ma-release ang Health Emergency Allowance (HEA) sang mga medical staff sang mga ospital nga ginapadalagan sang Provincial Government sang Negros Occidental nga nagserbisyo sadtong tion sang COVID-19 pandemic.
Ginpahayag ni Progressive Alliance of Capitol Employees (PACE) President Randy Peacita nga wala sa gihapon ma-download sang Department of Health Region 6 ang budget para sa HEA sang mga hospital staff sa Teresita Lopez Jalandoni Provincial Hospital sa Silay City kag mga district hospitals sa Cadiz City, Valladolid, La Carlota City, Isabela, Himamaylan City, Kabankalan City, Sipalay City kag Hinoba-an.
Suno kay Peacita, ang unclaimed HEA ang para sa mga bulan sang Agosto tubtob Disyembre sadtong 2021 kag Enero tubtob Hulyo sang 2023.
Ang kadakuon sang mabaton nga allowance ang magadepende sa exposure sang isa ka health personnel sadtong tion sang pandemya kun sa diin ang mga nagserbisyo sa COVID facilities ang magabaton sang tag-P9,000 kada bulan samtang P6,000 naman sa mga non-COVID facilities.
Nahibaluan gikan kay Peacita nga ang HEA sang mga health personnel sa Provincial Health Office subong man sa mga private hospitals kag LGU hospitals ang na-release na.
