Ginbawian sang kabuhi si Former Silay City Mayor Carlo Gamban tuga sang igo sang bala sa iya nga ulo, las-3:45 sang hapon, adlaw sang Lunes, Disyembre 2, sa sulod mismo sang iya nga kwarto sa Barangay Mambulac sa ciudad sang Silay. Ang anay alkalde ang naga-edad sang 85-anyos. Ginpahayag ni Police Lieutenant Colonel Mark Anthony Darocca, hepe sang Silay City Police Station, nakabati sang isa ka lupok ang duha ka mga kabulig sang anay alkalde samtang yara ini sila sa salas. Ila gilayon nga gintamwa si Gamban sa kwarto kag ila nakita nga may dugo na sa ulo ang biktima. Gilayon nga nagpangayo ini sila sang bulig matapos ang nasaksihan. Suno kay PLt. Col. Darocca, nasapwan si Gamban nga nagasandig sa folding bed nga malapit lamang sa iya hiligdaan nga wala na sang kabuhi. Narekober sa tunga sang lawas sang biktima ang wala pa matumod nga sahi sang revolver, kag isa ka slug sang bala sa tuo sini. Sa inisyal nga pagpangusisa sang kapulisan, sa tuo nga bahin sang ulo ni Gamban ang entrance sang igo ka bala nga naglapos sa wala. Natumod nga right-handed ang anay alkalde. Ginahulat pa sa karun ang resulta sang post mortem examination, kag natalana nga magpatigayon sang ballistic examination sa armas-luthang nga narekober. Dugang pa ni Darocca, wala pa sang foul play nga nakita sa kamatayon sang anay alkalde. Nahibaluan man nagasusprer ang biktima sang iya nga masakit tuga sang katigulangon sang kapin tatlo na ka semana.
