Ginbawian sang kabuhi ang isa ka motor rider sang Rusi TC 125 matapos nga aksidente ini nga nakabunggo sa Yamaha NMAX nga motor sa Barangay Bagtic, Silay City alas 11:40 sang aga, Disyembre 2, 2024. Ginkilala ang nagtaliwan nga biktima nga si Bartolome Villadar, residente sang Barangay Maitom, Escalante City kag ang driver sang Rusi TC 125 samtang ang driver naman sang Yamaha NMAX nga motor ginkilala nga si Joenel Ortinez, 49-anyos kag residente naman sang Zone 1, Brgy. Mambulac, Silay City. Base sa imbestigasyon, ang Rusi TC 125 nagabiyahe gikan sa Talisay City pakadto sa EB Magalona gamit ang inner lane samtang ang Yamaha NMAX ang nagasunod sa likod sini. Sang makalab-ot ini sa ginsambit nga lugar sang insidente, ang Rusi TC 125 nagmaniobra nga magaliko kuntani sa wala nga bahin sang dalan pakadto sa Triumph Home Depot apang aksidente nga nabunggo sa atubang nga bahin sang Yamaha NMAX. Bangud sini ang duha ka driver nahulog sa sementado nga dalan. Nakaangkon sang pilas sa ulo ang driver sang Rusi TC samtang pilas sa wala nga bahin sang abaga ang driver sang Yamaha NMAX. Gilayon naman nga gindala sang mga katapo sang DRRM ang mga ini apang ginbawian sang kabuhi si Villadar las kwatro sang hapon bangud sang kritikal nga kondisyon tuga sang naangkon sini nga head injury.
