Ginpaidalum sa state of calamity ang ciudad sang Bago, Negros Occidental bangud sa epekto sa paglupok sang Bulkan Kanlaon.
Kahapon, Disiembre 16, gin-aprubahan sang Sangguniang Panlungsod ang deklarasyon sandig sa rekomendasyon sang City Disaster Risk Reduction and Management Council. Suno kay Mayor Nicholas Yulo, mausar na sang ciudad ang P18 million gikan sa quick response fund agud nga magbulig sa mga evacuees.
Pahayag sang alkalde nga apektado sang ashfall ang tanan nga mga barangay sa ciudad apang pinakaapektado diri amo ang Mailum, Ilijan, Ma-ao kag Binubuhan. As of Sunday, nagdangat sa 366 ka mga indibidwal ang nagatinir sa apat ka mga evacuation centers sa Bago.
Madumduman nga sang Disiembre 13, una nga gindeklarar sang provincial government ang state of calamity sa bilog nga Negros Occidental.
