Gin-aprubahan sang Sangguniang Panlungsod sang Bacolod sang Lunes, Disyembre 23 ang P29.75 million nga gratuity pay sang mga job order (JO) kag contract of service (COS) workers sang Bacolod City government. Ini ang nasandig sa Administrative Order No. 28 ni Pangulong Ferdinand Marcos Jr. nga gin-issue sadtong Disiembre 19. Mabaton sang mga JO kag COS workers ang gratuity pay sini nga Biyernes, Disiembre 27. Nasaad sa mandu nga hatagan sang one-time gratuity pay nga indi magnubo sa P7,000 ang mga COS kag JO workers nga naka-render sang total ukon aggregated of at least apat ka bulan nga serbisyo as of December 15, 2024. Ang mga nagtrabaho naman sang 3 months but less than 4 months ang makabaton sang indi maglapaw sa P6,000; 2 months but less than 3 months makabaton sang indi maglapaw sa P5,000 kag indi naman maglapaw sa P4,000 ang mabaton sang mga nagtrabaho sang less than 2 months.
