Ginbawian sang kabuhi ang isa ka lalaki samtang pilason naman ang kaupod sini matapos ginluthang sang isa ka pulis sa Barangay Canjusa, banwa sang Pulupandan sa adlaw sang pagsaulog sang paskwa. Ginkilala ang nagtaliwan nga biktima nga si alyas Joman samtang ginkilala naman kay alyas Jomarie ang kaupod sini. Sa impormasyon gikan sa PRO 6, ang suspek nga pulis ang may ranggo nga police corporal. Nag-ugat ang insidente sang nagbakal ang duha ka mga biktima nga sanday alyas Joman kag alyas Jomarie sang ilimnon sa isa ka tiangge sang natabu ang pagbinaisay kag didto gintiro sang suspek ang mga ini. Gindeklarar nga dead on arrival sa Valladolid District Hospital si Joman samtang padayon nga nagapaayo si Jomarie. Suno kay PRO 6 director Brigadier General Jack Wanky, ginmandu-an na sini nga mag-imbestigar ang director sang Negros Occidental Police Provincial Office kag force commander sang Regional Mobile Force Battalion 6. Magluwas sa kaso kriminal, magapangatubang man sang kaso administratibo ang suspek kag posible nga makakas sa serbisyo. Pahayag ni Wanky nga kon madasig nga nagahatag sang pagkilala ang PRO-6 sa mga performing nga kapulisan, madasig man sila sa paghatag sang penlidad sa mga pulis nga nagaobra sang sala.
