Nagapaandam ang Phivolcs sa posible mas lala pa nga epekto sang bulkan Kanlaon tion nga magpadayon pa ang pagbuga sini sang aso nga may upod nga abo. Sa interview sang DYHB kay Kanlaon Volcano Observatory, Resident Volcanologist, Mari-Andylene Quintia, nga naglawig sang kapin lima ka oras ang pagbuga sang abo sang bulkan sang December 23. Kahapon, liwat naman nga nagbuga sang aso ang bulkan. Pahayag sini nga kun magpadayon pa ang kaangay sini nga aktibidad sang bulkan, buot silingon nagasulod na ini sa iya magmatic phase. Kag kun matabo ini, lauman ang asud-asod nga paglupok sang bulkan nga sarang magresulta sa posible lava flow. Sa pinakaulihi nga data sang Phivolcs, 25 ka volcanic eartquake kag apat ka tremor events ang narekord sang Disyembre 23 tubtob kahapon nga adlaw, Disyembre 24. Samtang, nakapanimaho naman sang asupre kahapon ang pila ka mga residente sa Barangay Ilijan kag Binubuhan sa ciudad sang Bago.
