Ginaabisuhan sang Philippine Institute of Volcanology and Seismology (PHIVOLCS) ang publiko angut sa nagapadayon nga magmatic unrest sang Bulkan Kanlaon halin sang paglupok sini tinalikdan nga Disyembre 9,2023. Pahayag sa ni PHIVOLCS chief of the Volcano Monitoring and Eruption Prediction Division Mariton Antonia Bornas, nga ila nakita sa data nga base sa aktibidad sang bulkan, kaangay nga nagapreparar ang Mt. Kanlaon sa liwat sini nga paglupok. Kun san-o, ano ka lawig kag ano kadako ang mangin halit sini, ina ang wala pa mahibaluan sang ahensya. Ginpahayag pa ni Bornas nga mas nagtaas ang aktibidad sang bulkan halin sang ulihi sini nga paglupok. Ginpahayag sini nga may nakita sila nga magma content halin sa abo nga ginabuga sang bulkan. Bangud nga wala nakitaan sang pagkalma ang bulkan sa ini nga mga tinion, pahayag sang PHIVOLCS nga indi pa gid masiguro kun san-o ukon liwat pa magalupok ang bulkan. Ang Monitoring data sang PHIVOLCS halin December 30 ang nagapakita sang mataas nga pag-release sang bulkan Kanlaon sang sulfur dioxide (SO2) sa diin naglab-ot ini sa 7,079 tons per day. “The volcanic activity is unpredictable,” ini ang paandam ni Bornas. Amo kun ngaa nagakadapat lang nga magapabilin nga handa ang mga LGU sa worst-case scenarios. Tubtob karon, nagapabilin pa sa gihapon sa Alert Level 3 ukon magmatic unrest ang bulkan.
