Padayun nga suspendido ang klase sa tanan nga lebel sa pribado kag pampubliko nga eskwelahan nga sakop sang banwa sang La Castellana. Santo sa social media post sang banwa, bangud wala sa gihapon sang mandu gikan sa LGU, magapabilin nga suspensido ang klase. Magapatigayon naman ang Incident Management Team (IMT) sang meeting angut sa pag-preparar sa pagbalik sang regular nga klase nga pagahiwaton las 10-:30 sang aga, Enero 2, 2025. Magahatag naman sang pahibalo ang banwa base sa desisyon sang patigayunon nga meeting. Nagpaguwa man sang mandu si City Mayor Rex R. Jalando-on nga nagasuspender sang in-person classes sa tanan nga lebel sa tanan nga eskwelahan nga sakup sang La Carlota City sumugod Enero 2-3, 2025. Magapabilin naman ini nga suspendido samtang wala sang mandu gikan sa LGU nga magabalik ini. Ang ini nga direktiba ang bilang sabat sa kahimtangan sang Bulkan Kanlaon. Ginmanduan man ni Mayor Jalando-on ang tanan nga eskwelahan nga ipatuman ang blended learning delivery modality sa sini nga panahon. Samtang nagapabilin man nga suspendido ang face-to-face classes elementary kag high school sa banwa sang Moises Padilla.
