Ginkilala bilang winner sang brand new Toyota Wigo ang residente gikan sa Barangay Villamonte sa High Five 2025 Bacolod’s New Year Countdown nga ginpatigayon sa Bacolod City Government Center kagab-i, Disyembre 31, 2024. Ang madinalag-on nga nagdaug ang ginkilala kay Danilo De La Rosa Amisola matapos ini ang gilayon nga nagsabat sa tawag sa gin-register sini nga numero gikan sa 100,000 ka mga entry. Nahibaluan nga una na kuntani nga nabunot ang pangalan ni Dolores Rodriguez Del Rosario sang Barangay Singcang-Airport apang nadulaan ini sang kahigayunan nga magdaug bangud wala ini makasabat sang tawag nga ginhimo sang makduha ka beses. Ang New Year’s Countdown ukon Salubong para sa 2025 sa BCGC ang ikatlo na nga tuig kun sa diin si Mayor Albee Benitez ang naga-sponsor sang mga premyo sa raffle gikan sa iya personal nga kuwarta halin sa mga minor prizes tubtob sa isa ka grand raffle prize. Magluwas sa raffle, may mga local kag national artists naman nga naghatag sang kasadya kag kalingawan sa mga tumalan-aw sa pagsug-alaw sang Bag-ong Tuig.
