Nakakompiskar sang masobra 4,000 tanan ka mga nagkalain-lain nga palupok ang Bacolod City Police Office sang Disyembre 2024. Ginpahayag ni BCPO Director Police Colonel Joeresty Coronica, nagdangat sa 135 ka mga boga ang narekober sa ciudad, kag 3,972 naman ka mga firecrackers kag fireworks ang narekober sa mga vendors nga nagatanyag sang ila mga palupok sa indi designated area nga nahamtang sa reclamation area kag amo man sa mga menor de edad nga nagapalupok. Suno kay PCol. Coronica, sa area of responsibility sang Police Station 3 ang may pinakadamo nga narekober nga boga kag kalabanan diri sa ila ang mga menor de edad. Natalana nga ipang gub-on ang amo nga mga palupok sa masunod nga semana agod indi na ini sarang magamit.
