Ginatun-an sa karon ni Governor Bong Lacson ang posibilidad sang pagpapauli na sang mga evacuees nga apektado sang pag-alburuto sang Bulkan Kanlaon. Sa una sini nga press conference sa tuig 2025, ginpahayag ni Governor Lacson nga sa pihak nga nagapabilin sa Alert Level 3 ang bulkan apang ila ginalantaw ang pangkabug-usan nga ikaayong-lawas sang mga evacuees. Dugang pa sang gobernador, mahimo kapuyon na ang mga pumuluyo sa pagtiner sa evacuation centers makaligad ang tatlo ka semana humalin sang naglupok ang Kanlaon sadtong Disyembre 9. Magapatawag si Lacson sang meeting upod sa Office of the Civil Defense agud istoryahan kun mahimo ipatuman ang pag-decamp kaangay sadtong una nagluntad ang phreatic eruption tinalikdan nga Hunyo 3.
