Gindagdagan sang Commission on Elections Second Division sang disqualification ang barangay kapitan kag pito ka barangay kagawad sang Barangay Marcelo sa banwa sang Calatrava, Negros Occidental bangud sang vote buying. Sa post sa official social media page sang COMELEC, ginhingadlan sanday Punong Barangay Arnulfo Siblag Libodlibod kag mga kagawad nga sanday Eddy Gustaman Monterde, Joel Cabiles Rosello, Hernane Montaño Cabugwas, Jeremias Caballero Diotay, Elmor Taghoy Marcelo, Richard Garcia Diotay kag Prescila Marcelo Patajo nga gin-disqualify bangud sang pagpamakal sang boto tinalikdan nga October 2023 Barangay and Sangguniang Kabataan Elections. Nagpamalibad naman si Negros Occidental Provincial Election Supervisor Atty. Ian Lee Ananoria sa paghatag sang komento kag detalye angot sa Disyembre 18 nga desisyon sang Comelec 2nd Division bangud sang nagapadayon nga imbestigasyon sa ginaalegar election offenses sang nasambit nga mga opisyal. Ginklaro naman sini nga sarang pa maka-file sang motion for reconsideration ang mga ini sa Comelec en banc. Ginpabutyag ni Ananoria nga ang desisyon ang nagapakita lamang nga seryoso ang Comelec sa pag-imbestigar sa mga reklamo nga ginapadangat sa ila.
