Ginbawian sang kabuhi ang duha ka tawo kag 18 ang pilason matapos nga naghugpaas ang eroplano sa Southern California, adlaw sang Huwebes, Enero 3. Suno kay Kristy Wells, spokesperson sang Fullerton police, pasado las-2 sang hapon natabo ang insidente sa Orange County. Gilayon nga nagresponde ang mga firefighters kag kapulisan sa lugar kag nagpakigbato sa kalayo kag ginpang-evacuate ang mga nakapalibot nga establisyemento kag mga negosyo. Kadungan sang paghugpaas sang eroplano, nasunog ang nahugpaan sini nga warehouse sang sewing machine kag mga tela. Napulo ka tawo ang yara sa ospital, samtang walo naman ang luwas sa katalagman. Suno kay Wells, wala pa natumod kun ano klase sang eroplano ang naghugpaas kag kun ang mga biktima ang sakay sini ukon yara sa kadutaan.
