Nagreport sang daku nga pagnubo ang Negros Occidental Police Provincial Office (NOCPPO) sa total crime rate incidents sa probinsya para sa 2024 kon ipaanggid sa nagligad nga tuig humalin Enero 1 tubtob Disyembre 31, 2024. Base sa rekord, may kabug-usan nga 3,885 ka mga insidente ang nadokumento, may pagnubo gikan sa 4,471 ka mga insidente nga ginreport sa pareha nga timeframe sang 2023 kag nagpakita nga nagnubo sang 586 ka mga insidente, nga katumbas sa 13.11% nga pagnubo sa krimen. Nagpalab-ot naman sang iya pagdayaw si NOCPPO Provincial Director PCOL Rainerio M De Chavez sa mga mga hepe sang tagsa ka Police Station sa probinsya kaupod ang mga katapo sang kapulisan sa ginakabig daku nga kadalag-an kag nagahinyo nga ini ang padayunon para sa kaayuhan sang probinsya. Nagahinyo naman ang kapulisan sa publiko nga magpabilin nga mabinantayon kag ireport ang anuman nga makaduluda nga mga hilikuton, bangud ang pag-intra sang komunidad ang importante sa pagmentinar sang kalinong kag katawhay sa bug-os nga probinsya.
