Ginserbe sang Negros Occidental Provincial Police Office (NOCPPO) ang warrant of arrest sa kaso nga terrorism financing sa tatlo ka tawo nga residente sang probinsya. Ginpahayag ni NOCPPO Spokesperson Police Captain Judesses Catalogo, ginserbe ang amo nga warrant of arrest pinaagi sa joint operation sang awtoridad sang tinalikdan nga January 2, 2025 kag ini ang ginfile sang Department of Justice (DOJ). Ang mga ginserbehan sang warrant amo sanday alias Dharyll sang Isabela, alias Perla sang Cauayan, kag alias Federico sang Pulupandan. Base sa ginserbe sang NOCPPO nga warrant, si Dharyll ang ginserbehan sang isa ka warrant sa paglapas sang Section 8 sang Republic Act of 10168 ukon “Terrorism Financing Prevention and Supression Act of 2012”. Samtang sa kapareho nga kaso si Perla ang ginserbehan sang tatlo ka warrant, kag duha naman kay Federico. Sa kada warrant of arrest nga ginserbe, may ₱200,000 nga balor sang ginarekomendar nga piyansa, kun sa diin natigayon nga nakapiyansa si Dharyll. Natalana nga pagadal-on ang tatlo sa Iloilo agod magpakita sang ila presensya sa korte. Dugang sina si Dharyll ang nakabaton sang separado nga warrant sang kapareho nga kaso nga ginserbe naman sang Isabela Municipal Police Station. Sanday Dharyll, Perla, kag Federico ang nagatrabaho sa Paghidaet sa Kauswagan Development Group (PDG) Inc. kun sa diin ini ang isa ka orgranisasyon nga nakabase sa Southern Negros nga ang adbokasiya amo ang para sa agrarian reform, agrikultura, kinamatarong sang magagmay nga mga mangunguma kag manugpanagat.
