Nagdeklarar na sang state of emergency ang pito ka mga estado sa United States bangod sa winter storm. Ang amo nga mga estado ang ginalakipan sang Kentucky, Virginia, West Virginia, Arkansas, pila ka bahin sang New Jersey, Kansas, kag Missouri. Ang Kansas kag Missouri ang pila sa mga lugar nga pinaka-apektado sang winter storm kun sa diin sang Enero 5, masobra 10 inches ang kadamulon sang niyebe ang nagtupa sa lugar. Yara sa masobra 60 million ka mga residente sang US nagikan sa masobra 30 ka estado ang nagaka-eksperyensiya sang tuman ka baskog nga winter storm nga posible magadala sang mabug-at nga snowfall kag mabugnaw nga temperatura sa sulod sang masobra isa ka dekada. Nagdangat na sa 3,300 inbound kag outbound flight sa US ang nadelay samtang 1,700 naman ang ginkanselar ang biyahe bangod sa winter storm.
