Ginpasidunggan sang Negros Occidental Police Provincial Office [NOCPPO] ang walo ka mga Police Stations gikan sa mga ciudad kag kabanwahanan sang Negros Occidental kadungan sang 31st Philippine National Police (PNP) Ethics Day celebration nga ginhiwat sa Kanlaon Hall, Camp Alfredo M. Montelibano Sr., Barangay Estefania, Bacolod City subong nga adlaw, Enero 6, 2025. Tema sang kahiwatan ang “Serbisyong may Integridad at Panangutan, Tungo sa Ligtas at Mapayapang Pilipinas”, kun sa diin ginkilala ang nagkalain-lain nga mga Police Stations bangud sa ila pinasahi nga performance sa angut sa sang serbisyo publiko kag pagmentinar sang peace and order. Sa bahin sang may pinakamadamo nga police operations batok sa iligal nga droga ginkilala ang Police Station sang Silay, EB Magalona, Hinigaran, Hinoba-an kag Ilog. Samtang ginkilala naman ang mga Municipal Police Station sang Manapla, Pontevedra, kag Pulupandan sa bahin sang Most Number of Operations on Other Wanted Persons. Nakabaton man sang pagkilala si Cristina Sarana, isa ka spoken word poet nga naghimo sang isa ka piyesa sa iya vlog nga nagpabaskog sang moral kag dedikasyon sang PNP. Ang pagkilala sa mga ini ang ginpangunahan ni NOCPPO Provincial Director, PCOL. Rainerio De Chavez kaupod ang Director II sang Civil Service Commission (CSC) Negros Occidental Field Office nga si Atty. Phillip Bernard H. Capadosa nga nagserbe bilang guest of honor kag speaker sang kahiwatan.
