Nagakahangawa sa karun ang himata sang tatlo ka mga missing sa ciudad sang Bacolod sadtong Hunyo 2, 2024, sa posibilidad nga ini ang mga nasapwan nga kalabera sa Hacienda Garcia sa Barangay Alangilan sa ciudad sang Bacolod. Madumduman una nga nakita ang isa kalabera sa lugar sang Nobyembre 12, 2024 kag nagapabilin ini nga wala sang identity. Liwat naman nga may nasapwan nga duha ka kalabera sa kapareho nga kampo sang Enero 8, 2025. Sa eksklusibo nga pahayag sang DYHB kay Trisha Antiquerra, himata sang mga missing person kag gina-alegar biktima sang abduction nga nanday Lorebelle Antiquerra, 44-anyos; Joem Villacoer, live-in partner ni Lorebelle, 37-anyos; Jonel Nangan, 25-anyos; kag lunsay mga residente sang Barangay Mansilingan; siya ang nakahangawa nga possible ang nasapwan nga mga kalabera ang madugay na nila nga ginapangita. Nahibaluan nga matapos ginpanawagan ni Trisha ang tatlo niya ka mga himata, wala gid ini may nakuha nga impormasyon ukon balita nga may nakakita sa mga ini. Luyag ni Trisha nga makompirmar kag mapangitaan paagi nga makilala ang pagkakilanlan sang amo nga mga kalabera. Dugang pa sini, iya ginapanagupnupan nga ang nasapwan nga gina-alegar babayi nga kalabera ang iya iloy nga si Lorebelle, apang luyag pa ini niya makompirmar pinaagi sa nagakaigo nga proseso ukon eksaminasyon.
