Pilason ang tricycle driver kag ang duha sini ka mga pasahero matapos mabungguan sang Mitsubishi Fuso nga salakyan sa bahin sang National Highway sa Sitio Overflow, Barangay Hilamonan, Kabankalan City alas-2:10 sang hapon, Enero 8, 2025. Ginkilala ang driver sang Rusi 150 tricycle nga si Clarence Morales, 44-anyos kaupod ang duha sini ka menor de edad nga pasahero lunsay mga residente sang Purok Fine tree, Barangay Oringao samtang ang driver naman sang Mitsubishi Fuso ang ginkilala kay Seth Repoyla, 58-anyos kag residente sang Sitio Iba, Barangay Hagtu, Mabinay, Negros Oriental. Base sa impormasyon, ang Rusi 150 nga tricycle ang gikan sa Barangay Oringao padulong sa ciudad sang Kabankalan kag pag-abot sa nasambit nga lugar sang insidente nagliko ini sa wala nga direksyon padulong sa inner lane sang highway kun sa diin nagabyahe naman diri ang Mitsubishi Fuso sa amo man lane. Bangud sini, nadulaan sang kontrol ang driver sang Mitsubishi Fuso kag hinali ini nga nagbunggo sa likod nga bahin sang tricycle, nga nagtuga naman sang pasubsob sini sa dalan kag nagresulta sa pag-angkon sang mga pilas sa driver kag sa duha ka pasahero sa nagkalain-lain nga bahin sang ila lawas. Gilayon naman nga gindala sa District Hospital Kabankalan ang mga ini para sa nagakaigo nga pagbulong. Ang tricycle kag ang salakyan ang temporaryo naman nga gin-hold sa Barangay Hilamonan, ciudad sang Kabankalan para sa nagakaigo nga disposisyon.
