Ginabulubanta magadangat sa 50,000 tubtob 70,000 members sang Iglesia ni Cristo ang magatambong sa National Rally for Peace nga pagapatigayunon sa Provincial Capitol Lagoon sa ciudad sang Bacolod, sini nga adlaw, January 13, 2025. Ginpahayag ni Jose Antonio Robello, Deputy Chief sang Bacolod Traffic Authority Office (BTAO), magapatigayon sang road closure bwas nga adlaw sa may bahin sang Cottage road padulong 15th Lacson Street, North kag South Capitol Road bangod sa amo nga aktibidad, las-6 sang aga tubtob las-12 sang tungang kaagahon. Natalana nga magadeploy sang 70 ka mga traffic enforcers ang ciudad sa lugar agod mag-bantay sa lakat sang trapiko. Una na nga ginpahayag nga yara lamang sa kapin 20,000 ka mga member sang INC ang mapadulong sa ciudad apang nagdamo ini bangod magapadulong man ang mga miyembro nga nagikan sa Negros Oriental. Suno kay Robello, tuga sang road closure, liwat nga paga-obserbaron ang rerouting plan kaangay sang Masskara Festival, kun sa diin ang mga motorista nga magapadulong sa Norte ang sarang makaagi sa dalan Aguinaldo, kag ang padulong naman sa Sur, ang magaagi sa dalan Gatuslao. Samtang, nakapreparar naman ang Bacolod City Police Office suno kay Police Captain Ma. Liberty Indiape, natuhoy sa ila nga deployment agod masiguro ang seguridad sang tagsa ka nga indibidwal. Indi magnubo sa 130 ka mga police personnel ang iga-deploy sang BCPO sa patigayunon nga National Rally for Peace. Magadeploy man ang Bureau of Fire Protection-Bacolod sang 15 ka mga personnel kag 20 naman sa City Disaster Risk Reduction and Management Office.
