Nagapanawagan ang administrator sang Office of the Civil Defense (OCD) sa local governments sang Bago City kag La Castellana angut sa desisyon nga pagpauli damlag pa sang masobra 4,000 ka evacuees nga naga-istar sa guwa sang 6-kilometer extended danger zone (EDZ) sang Mt. Kanlaon. Si OCD administrator, Undersecretary Ariel Nepomuceno ang nagaapelar sa mga opisyal sang Bago City kag La Castellana nga gilayon i-rekonsiderar ang ila nangin desisyon. Dugang pa sang opisyal dapat nga handaan sang mga LGUs ang worst-case scenario sang mas mabaskog pa nga paglupok sang bulkan. Prayoridad sang OCD nga wala sang marekord nga casualties sa tion sang liwat paglupok sang bulkan. Ini ang kasunod sang paandam sang Philippine Institute of Volcanology and Seismology (PHIVOLCS) sang posibilidad nga ipasaka pa sa Level 4 ang alert status sang Kanlaon kag ang 6-KM extended danger zone ang palaparon pa sa 10 kilometers.
