Ginalantaw sang Talisay City Police Station ang tatlo ka motibo sa pagpatay sa call center agent nga nasapwan sa Hacienda Nilo Lizares Barangay Matab-ang sa ciudad sang Talisay sang tinalikdan nga Enero 12. Ang biktima ang ginkilala nga si Carl Kimberlyn Degabi, 31-anyos, kag residente sang Eroreco Subdivision Barangay Mandalagan sa ciudad sang Bacolod. Ginpahayag ni Talisay CPS Deputy Chief Police Major Rhazl Jim Jocson, ang tatlo ka mga motibo nga ginalantaw sa karun nga possible gintunaan sang krimen amo ang mga akusasyon kag alegasyon batok kay Degabi nga ini ang nagapang-scam, possible nga ini ang ginhimuslan bangod wala na ini sang pag-idalom nga panapton sang nasapwan, kag natuhoy sa pagfile sang biktima sang kaso sa korte. Nahibaluan nga may ginpasakaan sang kaso si Degabi kag padayon ini nga gina-hearing sa korte; kag ini sa karun ang gina-verify kag ginahibalo sang mga katapo sang kapulisan natuhoy sa amo nga kaso kag kun sin-o ang ginpasakaan sang biktima. May pila naman na ka mga persons of interest ang gina-imbestigaran sa karun sang Talisay CPS. Natigayon naman na nga na-autopsy ang bangkay sang biktima kag masobra sa isa ka semana ang pagahulton sa pagwa sang resulta.
