Ginahanda sang Commission on Election (COMELEC) ang plano natuhoy sa contingent polling center para sa mga evacuees nga apektado sang Bulkan Kanlaon sa nagahilapit nga Midterm Election 2025. Suno kay COMELEC Provincial Election Supervisor Atty. Ian Lee Ananoria, gina-finalize kag gina-formulate sa karun ang plano para sa nagahilapit nga election para sa mga tawo nga apektado sang bulkan, sa bulig sang Office of the Civil Defense Office natuhoy sa desisyon. Ang mangin contingent polling center amo ang mga buluthuan nga wala pa sang may nagatinir nga evacuees apang pananglitan nga liwat maglupok ang bulkan, magapatukod ang COMELEC sang make-shift polling center. Sa make-shift polling center, kun wala na sang available nga buluthuan nga pagabotohan sang mga evacuees, magapatindog sang tent ang COMELEC nga maga-serbe nga lugar nga mapatigayon sang boto. Dugang pa ni Ananoria, naga-koordinar naman sila sa karun sa Department of Education kag Disaster Risk Reduction Management Office natuhoy sa amo nga preparasyon.
