Ginbawian sang kabuhi ang isa sa mag-utod samtang isa ang pilason matapos nga sila ang ginluthang sang wala pa makilala nga suspetsado sa Antonio Luna Interior, Barangay Mambulac sa ciudad sang Silay, pasado las-8 sang gab-i, Enero 18. Ang ginbawian sang kabuhi ang ginkilala nga si alias ‘Mark’ kag ang pilason naman amo si alias ‘Paulo’, pareho nga pedicab driver ang duha kag mga residente sa amo nga lugar. Base sa record sang Silay City Police Station, samtang naga-inom sang makahulubog nga ilimnon sa sulod sang compound ang mag-utod, nag-abot ang suspetsado sa lugar kag hinali ginluthang nanday Paulo kag Mark. Nakagaom sang pilas sa ulo si Mark kag sa likod sang lawas naman si Paulo tuga sang pagpangluthang. Gilayon nga nagpalagyo ang suspetsado matapos ang krimen. Gindala sa ospital ang mga biktima apang gindeklarar nga dead on arrival si Mark. Padayon ang pursuit operation kag imbestigasyon sang Silay CPS agod matumod ang suspetsado.
