Matuod nga indi maka agwanta ang isa ka iloy nga makita nga naga antos ang iya anak. Halos tanan sarang i-sakripisyo, masiguro lang nga yara sa maayo nga kahimtangan ang anak sini. Mapatawo, mapasapat, ang isa ka iloy ang may dako gid nga role sa kabuhi sang anak sini. Natandog ang tagipusuon sang kadam-an matapos nga naglapta sa social media ang litrato sang isa ka ido sa Turkey sa diin ginakagat sini ang iya puppy padulong sa isa ka veterinary clinic. Una na nga na-capture sa CCTV ang footage sang isa ka iloy nga ido sa gwa sang vet clinic sa Adnan Kahvec, Istanbul sa diin bitbit sini ang puppy nga wala na nagagiyo. Antis sang ini nga hitabo, isa ka animal lover ang una nga nagdala sang puppy nga nakita sini sa dalan sa diin tuman na ini ka luya, bangud sang pagkabalaka, gindala niya ini kag ginpabulong sa clinic . Ginaalegar nga nagkalamasakit ang mga layaw nga ido bangud sang bacteria nga nagalapta sa mga sapat. Sa ini nga mga tinion, nasiplatan nga nagahulat lang ang iloy sang puppy sa gwa apang makaligad ang pila ka minuto hinali lang ini nadula kag sa iya pagbalik, bitbit sini ang isa pa ka tutoy nga nalipungan. Ginaalegar sang mga doktor nga nakaagum ini sang hypothermia. Natukiban man nga luya na ang pagginhawa sang tutoy sadto nga mga inoras. Maayo lang, natigayon nga masalbar ni Dr Baturalp Oghan kag sang team sini ang nasambit nga tutoy. Bangud nga indi supisyente ang gatas sang iloy nga ido, ginapa dede nalang sang formula ang mga tutoy agud may sustansiya lang sa gihapon ang ila lawas.
