Natalana nga magasugod ang “Operation Baklas” sang Commission on Elections (COMELEC) sa mga campaign tarpaulins ukon posters sang mga kandidato sa adlaw nga pagsugod sang campaign period. Suno kay Bacolod Election Officer Atty. Revo Sorbito, indi pa authorized ang Comelec nga mangbaklas ang masobra isa ka gatos nga mga campaign posters nga makit-an sa mga pampubliko nga lugar sa ciuudad. Sa pagsugod sang campaign period, natalana nga pagakuhaon ang mga campaign posters nga wala sa insakto nga poster areas kag wala nagasunod sa 2 feet by 3 feet nga standard size. Ginpahayag man sang Election Officer nga base sa omnibus election code, indi pwede mangampanya kag mag-endorso ang mga barangay officials sang ila mga gina-supurtahan nga mga kandidato. Dugang pa ni Sorbito, pananglitan makit-an ang mga ini nga nagadulama kag nagatakod sang posters, sarang ang mga ini makasuhan. Nahibaluan nga magasugod ang campaign period para sa mga Senatorial kag Party List candidate sa maabot nga Pebrero 11 samtang magasugod naman ang kampanya para sa mga local candidate sa Marso 28, 2025.
