Magapatigayon pa sang reassessment ang Commission on Elections sa pagkalakip sang lima ka lugar sa Negros Occidental sa areas of concern angot sa May 12 nga piniliay. Ginpahayag ni Provincial Election Supervisor Atty. Ian Lee Ananoria nga ila pa pagatalakayon ang nasambit nga impormasyon gikan sa Committee on the Ban on Firearms and Security Concerns (CBFSC) kag magahiwat man sila sang reassessment. Una na nga nagdeklarar ang Provincial Comelec upod sa Philippine National Police kag Armed Forces of the Philippines nga ipaidalom sa category green ukon malinong kag matawhay ang Negros Occidental angot sa piniliay. Apang sang damlag lang, ginpalayag ni Comelec Commissioner kag CBFSC Head Aimee Ferolino nga na-classify ang mga banwa sang Isabela kag San Enrique nga sa category yellow samtang category orange naman ang Calatrava, Cauayan kag Sipalay City. Suno kay Atty. Ananoria nga possible may iban nga qualifications ukon reports nga nabaton ang CBFSC. Ang yellow category nagakahulugan nga may nagluntad sang suspected election-related incidents sa nakaligad nga duha ka eleksyon kag may presensiya sang intense partisan political rivalry apang wala sang domestic terror groups. Samtang ang orange category naman ang nagakahulugan nga may kombinasyon sang duha ukon masobra pa nga factors sa idalom sang category yellow ukon may seryoso nga armed threats gikan sa community terrorist groups.
