Madinalag-on nga nadakpan sang Bacolod City Police Office (BCPO) Intelligence Unit sa bulig sang Philippine Drug Enforcement Agency ang ginakabig rank 7 most wanted person sang Bacolod City sa Barangay Villamonte alas-8:36 kagab-I, Enero 19, 2025. Ginkilala ang suspetsado nga si alyas Andrew, 48-anyos isa ka negosyante kag residente sang Barangay Mansilingan. Natigayon ini nga na-aresto pinaagi sa warrant of arrest bangud sa paglapas sa Section 11 sang Republic Act 9165 ukon ang Comprehensive Dangerous Drugs Act of 2002 kag wala sang piyansa nga ginarekomendar. Nagpalab-ot naman sang pagdayaw si Police Regional Office 6 Director, Brigadier General Jack L. Wanky sa mga katapo sang BCPO nga nangin kabahin sang operasyon sa ila wala untat nga pagtinguha batok sa mga wanted persons. Ginpahayag man ni Wanky nga padayun nga lagson sa mga kapulisan ang mga nabilin nga wanted persons sa rehiyon kag pagadal-on sa korte agud hatagan sang hustisya ang ila mga nangin biktima. Sa karon yara na sa kustodiya sang kapulisan ang akusado kag natalana nga igaturn-over sa natungdan nga korte.
