Naglab-ot sa masobra tunga sa milyon ang balor sang druga nga narekober gikan sa duha ka persona sa ginpatigayon nga buy-bust operation sa 6th Street, Barangay 7, Bacolod City alas-12:47 sang kaagahon, Enero 23, 2025. Ginkilala ang duha ka arestado sanday Jaypee Yasas-20 anyos, residente sang Purok Sigay, Barangay 2 isa ka high value individual (HVI) kag Edgar Loraña, 29-anyos, ginakabig street level individual (SLI) kag residente naman sang Purok Magtiayon Barangay 10 sang nasambit nga ciudad. Narekober sa mga suspetsado ang 80 grams sang suspected shabu nga ginabulubanta may may standard drug price nga P544,000 kag iban pa nga mga non-drug items. Sa karon, yara na sa kustodiya sang kapulisan ang duha ka mga suspetsado kag magapangatubang sang kaso nga paglapas sa RA 9165 ukon ang Comprehensive Dangerous Drug Act of 2002.
