Ginbawian sang kabuhi ang motor rider nga lalaki matapos gina-alegar ginluthang sang wala pa makilal-an nga suspetsado sa Zone 1, Barangay Handumanan, Bacolod City pasado las-5 sang hapon, Enero 22, 2025. Base sa impormasyon nga nakuha sang DYHB, ang biktima ang isa ka kalbo, nakasuksok sang itom nga t-shirt kag itom nga pang-idalum nga panapton, yara sa ginabulubanta 35 tubtob 40 anyos ang pang-edaron kag nagamaneho sang Honda TMX 125 nga motor nga wala sang plate number. Samtang ang wala pa makilal-an nga suspetsado ang nagamaneho sang pula nga duag sang motor, nagasuksok sang t-shirt nga may pula kag puti naman nga duag nga base sa kuha sang CCTV malapit sa lugar. Ginpahayag ni Bacolod Police Station 10 Chief of Police PCAPT. Glenn Montaño nga suno sa nakasaksi sang insidente, pareho nga naga-maneho sang motor ang suspek kag biktima apang hinali lang nga ginbungguan sang suspek ang biktima nga nagresulta sang pagkatumba sini. Gilayon naman nga nagpagwa sang armas-luthang ang suspek samtang nagahambal ang biktima nga indi ini pagtiruhon bangud may ginasagod pa ini apang nagsabat ang suspek nga wala ini sang labot sa iya nga problema kag gintiro ini sang maka-lima ka beses kag madasig nga nagpalagyo. Narekober malapit sa biktima ang duha ka taglima ka kilo sang bugas kag duha ka bala sang butane nga ginbakal sini sa tiangge nga malapit sa gintunaan sang krimen. Padayun naman ang imbestigasyon sang kapulisan natuhoy sa identity sang biktima kag suspek kag ang posible motibo sang krimen.
