Sarang na nga maistaran sang mga benepisyaryo ang 64 ka housing units sa Asenso Yuhum housing units sa idalum sang Pambansang Pabahay para sa Pilipino Housing (4PH) Program nga nahamtang sa Arao, Barangay Vista Alegre, Bacolod City. Kadungan sang ginpatigayon nga turn-over sang Enero 25, amo ang blessing sang mga housing units nga nahamtang sa Building 1 sarang na magamit kag masayluhan sang pila ka mga benipisyaryo. Nahibaluan nga magadangat sa kapin 4,000 ka mga housing units ang natalana nga mapatindog sa idalum sang 4PH program samtang sa karon, 64 housing units ang pwede na ma-istaran kun sa diin nagalapad sang kapin 24 square meters ang kada unit. Sandig sa computation sang Pag-IBIG, magadangat sa P2,194.84 kada bulan ang balayran nga may maximum repayment term sang 30 years. Ang 4PH ang isa sa mga flagship programs sang administrasyon ni Pangulong Ferdinand Marcos Jr kag ang pagbuligay sa tunga sang local kag national governments sa pagsabat sang mga kinahanglanon sa pabalay sang mga pumuluyo sang Bacolod.
