Partially damage ang bodega sang gallonan kag pila ka mga hardware supplies sa nagluntad nga sunog sa bahin sang Galo-Lopez Jaena St. sakop sang Barangay 27 sa ciudad sang Bacolod, pasado las-11 sang aga, Enero 27. Ang amo nga establisyemento ang ginarentahan sang Shining Seas Purified Drinking Water kay Emme Ledesma. Suno kay Edison Ledesma, isa sa mga nagapanag-iya sang amo nga propedad, sa likod nga bahin sang bodega nagsugod ang kalayo kag wala sang tawo sang natabo ang insidente. Gilayon nga nagresponde ang mga bombero sa amo nga sunog ilabi na nga ang bodega ang tupad lamang sa gasolinahan. Nagdangat sa ₱825,000 ang balor sang nangin kahalitan sang sunog nga nagluntad sa lugar. Sa karun padayon ang imbestigasyon sang Bureau of Fire Protection-Bacolod kun ano ang ginhalinan sang kalayo, kag wala naman sang may nasamaran sang nagluntad ang sunog.
