Padayon nga nagabuga sang abo kag aso ang Bulkan Kanlaon halin kahapon. Santo record sang PHIVOLCS, narekord ang pagbuga sang abo las-3:51 sini nga kaagahon. Nagataas sang 300 meters ang ginabuga nga abo kag napalid sa west nga direksyon. Samtang kahapon, makalima ka beses man nga nagbuga sang abo kag aso ang bulkan. Santo sa report sang PHIVOLCS, nagluntad ang ash emissions sa Kanlaon, las-5:40 sang kaagahon tubtob las-6:07 sang aga kag las-9:42 sang aga tubtob las-10:28 sang aga. Liwat nga nagbuga sang abo kag aso ang bulkan las-12:22 sang tungang udto kag las-3:47 sang hapon tubtob las-4:25 sang hapon. Nagbuga sang grayish plumes ang bulkan nga nagsaka sang 200 tubtob 750 meters kag napalid padulong sa southwest direction. Kasunod sini ang narekord nga light ashfall sa La Castellana kag La Carlota City. Magluwas sa pagbuga sang abo kag aso may narekord man nga pagtay-og sa Mount Kanlaon.
