Isa ka sunfish ang halos wala na sang gana magkaon matapos nga ginpauntat sang management sang isa ka aquarium sa Japan ang pagbaton sang bisita bangud sang ginapatigayon nga renovation sa nasambit nga tourist destination. Isa ka video ang gin-upload sa social media sa diin makita ang nangin ideya sang management sang Yamaguchi Prefecture sa Japan agud mabalik ang kapaskog sang sunfish sini nga naapektuhan bangud nga wala na ini liwat pa nakakita tawo. Temporaryo nga ginpasirad-an ang Shimonoseki City Aquarium Kaikyokan halin pa sang December 1, 2024 agud mapaidalum sa restoration ang mga pasilidad sini. Sang nasambit nga mga tinion, natalupangdan sang management nga nadulaan sang gana sa pagkaon ang ila sunfish nga sadto pwerte ka pagsik kag may pagka “curious” ang personality. Ginpahayag sang isa ka staff sang aquiarium nga posible nagapaluya ang isda bangud nasubuan ini. Amo kun ngaa ila napinsaran nga magpang gunting litrato sang mga tawo kag pila ka mga uniforms kag ginpatapom ini sa gwa sang aquarium. January 9 sang ila natalupangdan nga nagbalik ma ang gana sang sunfish sa pagkaon.
