Masobra 500,000 ka indibidwal ang nagpakigbahin sa highlights sang Dinagsa Festival 2025 sa ciudad sang Cadiz, adlaw sang Domingo, January 26. Ginkalipay ni Mayor Salvador Escalante Jr. ang nangin selebrasyon sang kapiyestahan bangod magluwas sa mga Cadiznon kag Negrense nga nagpadulong ciudad, nagpakigbahin man ang mga indibidwal nga nagikan sa Cebu, Panay, Negros Oriental, Siquijor, Bohol, kag diin pa nga bahin sang Pilipinas kag luwas sang pungsod. Ginsolusyonan man sang ciudad ang problema sa trapiko sa ciudad sa pagpatigayon sang kapiyestahan bangod isa ina sa mga problema nga gina-atubang kada tuig, rason nga ila ginbuksan ang parking area sa bahin sang reclamation area. Ginpasalamatan ni Escalante ang mga pumuluyo sang Cadiz kun sa diin ila ginpakita ang pagpalangga sa kultura ilabi na sang pagbuliganay sang isa kag isa sa tion sang problema. Dugang pa sang alkalde, half century na nga ginaselebrar ang kapiyestahan kag ini ang nagapakita sa progreso bangod ginakadtuan ini sang nagkalain-lain nga mga lahi.
