Ginkilala bilang grand champion sa Dinagsa Festival 2025 ang Tribu Sicablum Quatro kontra sa pito ka mga tribu nga nagpartisipar sa ika-50 nga Dinagsa Festival street dance competition kahapon nga adlaw, Enero 26, 2025. Nakuha man sang nasambit nga tribu ang award nga best in costume, best in choreography, best local choreographer, kag best local costume design. Ang Tribu Sicablum Quatro ang ginabug-usan sang mga dancers sang Barangay Sicaba, Barangay Luna, kag Barangay 4 sa syudad sang Cadiz. Nakuha sang tribu ang title halin sa 2023 Dinagsa Festival defending champion nga Tribu Bucad Cadiz Viejo sang Barangays Burgos, Caduhaan, Cadiz Viejo. Ginpauli sang grupo ang P200,000 cash plus P50,000 para sa duha ka minor awards. Sa pihak nga bahin, second placer kag Best in Performance naman ang Tribu Tinambi-Tres sang Barangay Tinampaan, Mabini kag Zone 3. Sa diin ginpauli sini ang P175,00 cash prizes. Samtang, yara naman sa Third place kag ginkilala nga Best in Sound and Rythym ang anay champion nga Tribu Bucad Cadiz Viejo, sa diin nakabaton ini sang P125,000 in cash prizes. Yara naman sa 4th place ang Tribu Hitalon sang Barangay Zones 1 kag 6 kag ginkilala nga Most Disciplined tribe, sila ang nagpauli sang P100,000 in cash prizes. Samtang nakabaton naman sang P50,000 nga consolation prizes ang Tribu Vilgus sang Barangay Celestino Villacin kag V.F. Gustilo; Tribu Yabyab Dungol sang Barangays Zones 2 kag 5. Upod man sini ang Tribu Majeca sang Barangay Magsaysay, Jerusalem kag Cabahug; kag Tribu Tibanda sang Barangay Tiglawigan, Banquerohan kag Daga. Ginpasalamatan kag gindayaw man ni Cadiz Mayor Salvador Escalante, Jr. ang mga barangay nga nagpartisipar kag nagpakita sang “world-class performances” sini nga 2025 street dance competition nga may tema: “Dinagsa goes international”.
