Sang bata pa kita, natural lang nga makabati sang akig halin sa aton ginikanan ilabi na kun nagapabaya kita sa aton pag eskwela. Kaangay sini ang natabo sa isa ka mag-amay sa Yongning County sa China sa diin gin akigan sang isa ka tatay ang 10 ka tuig sini nga anak bangud nga wala sini natapos ang iya nga assignment. Apang imbes nga manuto kag suguran na ubra ang iya assignment, nag gwa ang bata sa ila balay kag nagpadulong sa malapit nga tiyangge agud nga maggamit sang telepono. Diri iya gintawgan ang emergency number sang China kag nag-istorya sa pulis. Pahayag sini sa mga pulis nga may proweba siya nga may ginatago ang iya amay nga poppy shells nga amo ang makabig ginaalegar iligal nga droga. Gilayon nga nagpadulong sa ila balay ang mga pulis agud nga makumpirmar ang istorya sang bata kag sang ila pag-chekyar, nakit-an nila ang walo ka laya nga poppy shells kag gin-ako man sang amay nga nagbakal sia sini agud nga gamiton nga bulong. Nagpangayo man sang pasensya ang amay bangud sa paglapas sini sa layi apang gin-insister man sini nga wala siya nakahibalo nga makabig ini gali nga dangerous drug. Bangud sini, gindala sang kapulisan ang amay sa pinakamalapit nga police station kag ginpasa ang kaso niya sa Anti-Narcotics Brigade. Samtang ang bata naman ang nagtinir sa isa ka Child Protection institution.
