Nakahanda na ang mga katapo sang Bacolod City Police Office (BCPO) sa pagsiguro sang luwas kag masinadyahon nga selebrasyon sang Bacolaodiat Festival sa ciudad nga natalana patigayunon sa Dalan Lacson humalin Enero 28 tubtob Pebrero 2, 2025. Suno sa BCPO, komitibo ang kapulisan nga magdul-ong sang matawhay kag masadya nga kahiwatan sa kolaborasyon kag bulig sang local government unit sang ciudad, festival organizers, kag iban pa nga ahensya sang gobyerno. Natalana naman nga iga-deploy ang mga katapo sang PNP kag force multipliers sa mga nagkalain-lain nga areas sang selebrasyon agud mapabaskog ang mga pagtinguha sa pagtapna crime prevention, mapasanyog ang visibility sang kapulisan, kag makahatag sang bulig sa mga pumuluyo kag mga turista. Samtang, magapatuman naman sang komprehensibo nga traffic management plan kag magakoordinar ang BCPO sa Bacolod Traffic Authority Office (BTAO) agud masiguro ang matalunsay nga dalagan sang trapiko. Nahibaluan nga magapatigayon sang road closure sa pila ka mga mayor nga dalanon sa ciudad lakip na ang bahin sang North Capitol Road, 5th Street nga nagalab-ot sa 15th Street kag porsyon sang Aguinaldo Street para maghatag sang ligwa para sa main stage, mga food kiosk, mga activity hub kag iban pa nga mga atraksyon may angut sa kahiwatan. Ginpahayag ni BCPO City Director PCOL Joeresty P. Coronica nagapabilin nga komitibo ang kapulisan nga magdul-ong sang isa ka luwas kag halandumon nga Chinese New Year experience para sa tanan kag sa tagsa ka Bacolodnon.
