Nagbalik na sa tagsa ka mga panimalay ang pila ka mga Palestinian sa Gaza matapos ginpatuman ang ceasefire sa tunga sang Hamas group kag Israel. Ginabulubanta yara sa 10,000 ka mga tawo ang nagbalik sa ila mga panimalay matapos nga ginbuksan na sang Israel ang corridor padulong norte nga bahin. Nakita nga ginalakat lamang sang mga pumuluyo papuli bitbit ang mga kabataan kag personal nga kagamitan. Antes pa man ginpahanugotan nga sila ang makapauli, ang mga Palestinian ang naghulat sa higad sang dalan ukon baybay dala ang nga hiligdaan, tubig ilimnon, kag iban pa samtang nagahulat nga magabukas ang checkpoint nga nalakip sa kasugtanan sa pagpatigayon sang ceasefire. Suno kay Fasi Al Sinwar nga residente sang Gaza City, nahidlaw na ini sa ila nga panimalay bangod 470 days na sila nagatinir sa tents. Ang ila pagbalik gin-isol sang 48 ka oras pagkatapos nga gin-akusahan sang Israel ang Hamas nga naglapas sa mga kondisyon sang kasugtanan sa ceasefire natuhoy sa pagpahilway sa hostage nga si Arbel Yehud, nga nagpadugay sang pagbukas sang Netzarim corridor nga nagatunga sa teritoryo.
