Kapin P2.3 million nga balor sang kagamitan kag kasapatan ang ginbaton sang benepisyaryo nga mga mangunguma sa idalom sang Provincial Swine Industry and Recovery Initiatives and Animal Genetic Improvement and Livelihood Program sang Provincial Government sang Negros Occidental. Ginpangunahan ni Governor Bong Lacson ang pag-turnover sang 10 ka units kag balor P1.9 million nga motorsiklo, siyam ka units sang dummy sows nga balor P270,000; kag P130,000 nga balor sang kasapatan kaangay sang duha ka butakal nga baboy, 11 ka mga baktin kag tatlo ka mga baka. Angot sini, ginpahayag ni Provincial Veterinarian Dr. Placeda Lemana nga ang mga motorsiklo ang pagagamiton sang mga personnel sa animal district centers sa nagkalain-lain nga distrito para sa pag-monitor kag pag-surveillance. Ang mga dummy sows ang igapahamtang naman sa artificial insemination (AI) centers kag sa Negros First Ranch samtang ang mga laki nga baboy ang i-deploy sa AI centers sa Sagay City kag San Carlos City kag ang mga baktin ang ihatag sa mga hog raisers sa Manapla, Toboso kag Manapla. Suno kay Lemana, ang mga baka ang iga-award naman sa rebel returnees sa Barangay Camingawan, Kabankalan City nga gin-identify sang 303rd Infantry Brigade nga mangin benepisyaryo.
