Gintuyo sang Negros Occidental Police Provincial Office nga i-serve ang contempt order sang House of Representatives batok kay Silay City Legal Officer Atty. Janus Jarder. Ginpahayag ni NOCPPO Director Police Colonel Rainerio de Chavez nga sadtong Enero 6 gintuyo nga i-serve ang contempt order sa puluy-an ni Atty. Jarder apang wala ini kag ang iya lamang anak ang nagbaton sang dokumento. Paathag ni De Chavez, kun yara lamang si Atty. Jarder sang amo nga tion, ila ini nga iga-escort padulong sa detention facility sang Kamara. Sa madumduman nga gin-cite in contempt si Jarder sang House Committee on Public Accounts, nga ginapangunahan ni Abang Lingkod Partylist Representative kag Third District Caretaker Joseph Stephen Paduano, durante sang inquiry angot sa ginaalegar iregularidad sa procurement process sa P1.1 billion nga loan sang ciudad. Ini matapos naglikaw si Jarder sa pagsabat sang importante nga mga pamangkot kag paghaboy sang indi maayo nga sugilanon batok sa Kamara. Madumduman nga ginbuyagyag ni Silay City Health Officer Dr. Krisna Barnuevo nga sadtong November 10 ukon gab-i antes ang una nga hearing sadtong November 11, gin-abisuhan ni Jarder ang mga maga-attend nga indi magkaon ukon mag-inom sang gina-serve sa hearing bangud posible may impon ini nga droga. Ginbuyagyag man ni Dr. Barnuevo nga ginhambalan siya ni Jarder nga indi magtambong sa hearing sa Kongreso. Gintawag naman ni Atty. Jarder nga “congenital liar” si Barnuevo.
