Kapin 15 ka mga persona ang gin-aresto sang Negros Occidental kag Bacolod City police bangud sang paglapas sa Commission on Elections (Comelec) gun ban. Ginpahayag ni Negros Occidental PCol. Rainerio de Chavez nga 10 ka mga persona ang naaresto sa probinsya sang Negros Occidental Samtang, pahayag naman ni Bacolod City Director Police Colonel Joeresty Coronica nga may lima ka violators sa ciudad sang Bacolod. Base sa monitoring sang kapulisan, nagapabilin sa green category ukon peaceful kag wala sang election security threat ang Negros Occidental. Madumduman nga una na ginpahayag sang COMELEC ang mga areas of concern diri sa probinsya sa diin yara sa yellow Category ang mga banwa sang Isabela kag San Enrique samtang, orange category naman ang Calatrava, Cauayan kag Sipalay City. May angut sini, magahinun-anon naman sa liwat ang Provincial Joint Security Control Center para i-reassess ang sitwasyon sa Negros Occidental. Ang ini nga classification ang magaserbe bilang guide para sa preparasyon sang seguridad sa palaabuton nga eleksyon.
